దారంతా వెలుగు పూలు పరుచుకుంటు వెళుతున్నా ||
మమకారపు సుగంధాలు పంచుకుంటు వెళుతున్నా ||

చీకటి నా వెనుకగనే ఓడిపోయి నిలిచిందీ
సంబరాల అనుభూతులు నింపుకుంటు వెళుతున్నా ||

పచ్చనైన ప్రకృతంతా హాసాలను ఒంపుతోంది
చిరునవ్వుల సమీరాలు హత్తుకుంటు వెళుతున్నా ||

నా ముందరి బాటల్లో తోరణాల సందడులే
ఆహ్లాదపు వర్ణాలలో తడుచుకుంటు వెళుతున్నా ||

చూపులతో ఆహ్వానం చెపుతున్నా అందరికీ
మాధుర్యం గుండెల్లో మోసుకుంటు వెళుతున్నా ||
......వాణి