గుండెలోతున గుబురు కట్టిన చింత ఏమిటొ తెలియలేదు ||
కనుల ముంగిట సంచరించే చీకటేమిటొ తెలియలేదు ||
.
భావమైనది భారమంతా బ్రతుకుగీతను దాటలేక
రాగమద్దిన గేయమే అది గుబులు ఏమిటొ తెలియలేదు ||

.
చిక్కుముడులే జీవయాత్రలొ సుఖమైనా దుఃఖమైనా
మరణమే ఒక విషాదమైతే మర్మమేమిటొ తెలియలేదు ||
.
నిశలుఎప్పుడు నిష్ర్కమించవు కాంతి బాటను వెతుకుతాయి
తిమిరమెంతటి సహనమైనదొ బలిమి ఏమిటొ తెలియలేదు ||
.
కాలమహిమలు లెక్కలేనివి కదంత్రొక్కును విచిత్రంగా
ఉప్పెనొచ్చిన క్షణములాగవు గమ్యమేమిటొ తెలియలేదు ||
.
మౌనవాణిది మనసుయుద్ధం - సాగిపోయే జీవలాస్యం
ముసురుకున్నవి ఙ్ఞాపకాలే - లోతు ఏమిటొ తెలియలేదు ||
.......వాణి,