జీవనచట్రం జరగాలంటే - కాలపుకదలిక అవసరమేగా ||
పదములు అడుగులు నేర్వాలంటే - ఆశకు ఓపిక అవసరమేగా ||

చీకటి తీరపు వెన్నెల ఊహలు - మానసంలో మధురపుతలపులు
వెలుతురు బావిని ఈదాలంటే - మనసుకు జీవిక అవసరమేగా ||

మది సామ్రాజ్యంలో మెదిలే యోచన - అక్షరనావను నడుపుతున్నదీ
కవన జగతిలో భావప్రయాణం - మాటకు భూమిక అవసరమేగా ||

అనుబంధాలకు అలసటెందుకో - మమతలు మరుగున పడుతున్నాయే
అనురాగానికి అర్ధం తెలిపే - పలుకుల పదనిస అవసరమేగా ||

ఙ్ఞాపక గాయం రగిలే దుఃఖం - గాయం గేయం పాడుతున్నదీ
హృదయ సముద్రం ఎగిసేవేదన - గురుతుల చారిక అవసరమేగా ||

మధురవాణిదీ సంకట వేదన - సవరణకసలే సాధ్యంకాదే
నిన్నటి కథలే శోకపు శ్లోకం - మెరుపుల నవలిక అవసరమేగా ||
.........వాణి,