చీకటెనుక వెన్నెలలే నిలిచాయని తెలిసింది ॥
గాయాలే అనుభవమై నడిచాయని తెలిసింది ॥
కునుకులేని కన్నులతో శూన్యంతో కబురులెన్నొ
వడలిపోని జ్ఞాపకాలు తడిమాయని తెలిసింది ॥
ఎదురొచ్చిన చూపులేవొ ప్రశ్నిస్తూ నిలిచాయి
చిరునవ్వుల చిరునామా వెతికాయని తెలిసింది ॥
తుదిదాకా అరిగిపోవు అలసిపోని కోరికలు
ఆశలతో ఊపిరులే నిలిచాయని తెలిసింది ॥
తడిఇంకని కంటిపాప తలపులెన్ని మోస్తుందొ
ఆనవాళ్ళు గుండెల్లో గుచ్చాయని తెలిసింది ॥
ఆశించిన ఆకాంక్షలు కనులముందు తచ్చాడెను
మౌనమైన హాసాలే మురిసాయని తెలిసింది ॥
పలుకులేని పెదవుల్లో పదనిధులే దాగున్నవి
మౌనవాణి భావాలే మెరిసాయని తెలిసింది ॥
....వాణి ,