యాంత్రికం ....

అరచేతి ప్రపంచంలో అరుదైన ఆద్భుతాలెన్నో
ఆత్మీయత మరిచిన స్పర్శలమధ్య
సందేశంలోనే స్పందన చిరునవ్వు తొడుక్కుంటుంది

అర్ధరాత్రే మొదలైన గుడ్ మార్నింగ్ లు రేపటిలోకి తొంగి చూశాకే నిద్రకు ఉపక్రమిస్తాయి
సూర్యోదయాన్ని ఆలస్యంగా ఆహ్వానిస్తూ
బిజీగా గజి బిజిగా
బ్రతుకు యుద్ధానికి సన్నద్ధమౌతుంది సమాజం
ఇంటిలోని భావాలన్నీ చరవాణితో నిక్షిప్తమయ్యాక
నిర్లిప్తంగానే కాలం నిష్క్రమిస్తుంది
మురిసిపోతూ సెల్ఫీగానో
దినచర్యలన్నీ స్టేటస్సులుగానో
జ్నాపకాలన్నీ అంతర్జాలపు రంగుల్లోనో
నిశ్శబ్ద చిత్రాలై
ఇష్టంగానూ మెచ్చుకోలు స్పందనలోనో
సంతోషాన్ని పులుముకుంటూ ఉంటాయి
మారిన మనుషులు
మరుగైన అనుబంధాలు
ఆధునికత అలుముకున్న
భావాజాలంలో సాయంకూడా
స్వార్ధమై స్వచ్చతను కోల్పోతోంది
అవసరమైనదే సాంకేతికత
సమస్తమై పోయిందిపుడు...!!
.......వాణి,