తొలిస్పర్శ మనసంత నిమురుతూ ఉంటుంది ||
తండ్రైన గర్వమే నిండుతూ ఉంటుంది ||

మురిపంగ లాలిస్తు చేతుల్లొ పసితనం
సంతోష సవ్వడులు నింపుతూ ఉంటుంది ||

కదిలికలు మధురమై నాదైన పాపాయి
నాన్నంత తనదని నవ్వుతూ ఉంటుంది ||

నా కలల లోకంలొ అరుదైన అదృష్టం
చిరునవ్వు దీవెనగ చేరుతూ ఉంటుంది ||

తన బోసి నవ్వుల్లొ విజయాలు నావౌతు
ఆశ్చర్యమందంగ మిగులుతూ ఉంటుంది ||

చూపుల్లొ ప్రేమెంత ఆటల్లొ కేరింత
దరహాస మధురిమలు అద్దుతూ ఉంటుంది ||

నన్నంత మరిపిస్తు తానంత నాదౌతు
వెంటాడు ఆశగా తాకుతూ ఉంటుంది ||

ఇల్లంత గలగలలు తన అందె రవములతొ
కిలకిలల నవ్వులతొ వెలుగుతూ ఉంటుంది ||

చిన్నారి అమ్మగా అనురాగ మద్దుతూ
తడితలపు గుండెల్లొ తడుపుతూ ఉంటుంది ||
.........కొరటమద్ది వాణి