అడుగు అలసి పోతున్నది పయనమెలా నేస్తమా ?
మనసు మూగబోతున్నది పలుకుటెలా నేస్తమా ?
కదలలేని శిలనైతిని కన్నీటి వ్యధనైతిని
గమ్యమేమో తెలియలేదు చేరుటెలా నేస్తమా ?

నీడలోని నా రూపం కలవరపడుతున్నదేల
భారమైన ఈ మనసును వీడుటెలా నేస్తమా ?
అద్భుతాల లోకంలో అరుదైనది నా గమనం
దుఃఖాలను తిమిరంలో కలుపుటెలా నేస్తమా ?
గుండెలోతు గుబులెంతో దాచలేను దిగులంతా
శూన్యంలో స్వప్నాలను వెతుకుటెలా నేస్తమా ?
.......వాణి