ఆత్మీయత అవసరాల చెలిమిలాగ మారింది ||
స్వార్ధమే మనుష్యుల్లో కలిమిలాగ మారింది ||
.
క్షణముకంటె వేగంగా మనసుపరుగు పెడుతుంది
కదలకుండ ఆగలేని గాలిలాగ మారింది ||

.
మాటలన్ని కప్పుకుని మౌనంగా మిగిలాయి
జీవితమే యాంత్రికమై నటనలాగ మారింది ||
.
చూపులన్ని చిత్రంగా నిరాశతో నలిగాయి
బలవంతపు ఆశేదో ములుకులాగ మారింది ||
.
వింతగానె సాగుతోంది విధిలేక కాలమంత
మోహమాటపు స్పర్శలతో మిణుకులాగ మారింది ||
.
మధురమైన పలుకులేవి మౌనవాణి పిలుపుల్లో
నవ్వులేవి పెదవుల్లో వగపులాగ మారింది ||
.......వాణి కొరటమద్ది