తెరమాటున పలుకరించు మౌనమెంత బాగుంది ||
సైగలతో ననుతాకే చూపుఎంత బాగుంది ||

లేలేతపు వెలుగులలో సఖునికై ఎదురుచూపు
పలుకరింపు వేకువలో ఆశ ఎంత బాగుంది ||

కదలాడే పెదవులలో పలుకులేవొ తెలియదూ
వణుకుతున్న పెదవులలో కులుకుఎంత బాగుంది ||

నిన్నరేయి అలసటలే నీవదనం చెపుతోంది
కంటికింద నీడలలో అందమెంత బాగుంది ||

పైటచాటు నీమోమున పసిడికాంతి చూస్తున్నా
కనులతోన కనులుకలుపు కబురుఎంత బాగుంది ||

మూసివున్న రెప్పలలో కధలెన్నో దాచావు
నిశ్శబ్దపు నీమౌనం 'వాణి'ఎంత బాగుంది ||
............వాణి కొరటమద్ది